Se vi vojaĝas de la flughaveno Fiumicino aŭ de la historia haven-urbo Ostia sur la aŭtoŝoseo aŭ per trajno al la centro de Romo, vi ne povas pretervidi ĝin. Sur monteto rigarde al la maro staras la "palaco", konstruita de 1938 ĝis 1943, kun la grandeg-litera surskribo

"Popolo de poetoj, de artistoj, de herooj,

de sanktuloj, de pensuloj, de sciencistoj,

de navigaciistoj, de transmigrantoj".

Malantaŭ ĝi situas la plej granda kvartalo en faŝisma stilo en Italio, Eŭropo kaj probable la mondo, E.U.R. La itala mallongigo signifas Universala Ekspozicio de Romo, ĉar tie laŭ la intenco de Mussolini okazu tiu ekspozicio en 1942, sed fine pro la milito tamen ne okazis. Sesetaĝan fasadon kun ses volbo-arkadoj la "palaco" havas vertikale, naŭ volbaĵojn horizontale, kio signifas Benito Mussolini (6 + 9 literoj). La orientiĝo al la maro apud la bulevardo Kristoforo Kolombo kaj la NAVIGATORI kaj TRASMIGRATORI simbolas la tiaman italan pretendon regi la Mediteraneon aŭ en la tiuepoka termino "nian maron" (Italan).

Nu bone, estis la epoko, kiam Libio ankoraŭ estis itala kolonio kaj la "migranta" UK 1935 per ŝipo iris de Ĝenovo tra Romo kaj Napolo ĝis Tripolo sen iam ajn forlasi la Mussolini-ŝtaton. Nuntempe historio nur, eble por kelkaj interesa.

Sed kion Monato volas diri al ni, elektinte ĝuste tiun domon kiel simbolo de sia rubriko "turismo"?

------

Monato 31-a jaro 2011/08-09 (aŭg.-sept.), p. 26.