En Calgary, Vancouver, Montreal aŭ io simila antaŭ nelonge komenciĝis la Olimpiaj Vintraj Ludoj. Nu bone, egale, sendube. Sed diru mem, kiom egalaj estas al vi la Olimpiaj Ludoj precize?

  • tre egalaj
  • fekegalaj
  • fikegalaj
  • je 80% tre egalaj, 10% fekegalaj, la reston mi vere malŝategas
  • egalaj kiel la satira retejo de l' malbona onklo
  • egalaj kiel diskuto pri -ujo, landnomoj aŭ la har-aranĝo de Anna Löwenstein - ne, tamen, eĉ pli egalaj ol tio
  • mi ja estas "bonlingvulo" kaj tamen trovas ilin interesaj

Nu bone, tio estis antaŭ semajno. Intertempe la realo preterpasis satiron kaj dum la plej egalaj Olimpiaj Vintraj Ludoj en la historio de neĝo Jelena Ĥrustaljova, 29, gajnis la arĝentan medalon en io kiel pafi kaj kuri. Tio kompreneble estus egala ĝis plena nemencio, se Jelena Ĥrustaljova, 29, ne estus rifuzita de sia hejmlanda rusa teamo pro nudetaj bildoj en la kazaĥa eldono de Men's Health. Nu, tute nuda ŝi ne estis, ŝi ja portis skiojn kaj pafilon. Egalas, kio ne plaĉis al la rusaj sport-funkciuloj, ĉu la pafilo, la skioj, la mametoj de Jelena Ĥrustaljova, 29, aŭ simple la fakto, ke estis la kazaĥa eldono de Men's Health anstataŭ la rusa. Ili rifuzis al ŝi lokon en la rusa teamo, ŝi startis sub kazaĥa flago (tiulande ŝi intertempe estis iom konata, egale ĉu pro la skioj, la pafilo aŭ la mametoj) preterpasis ĉiujn ekskoleginojn el la rusa teamo kaj gajnis iun medalon, egale kiun. Laŭdire kelkaj politikisto en Ruslando intertempe laŭte pripensas, ĉu oni ne iom plilongigu la restadon de la ĉefo de l' rusa teamo en la neĝo ie oriente de Uralo por ni diru 30 aŭ 40 jaroj.

Gratulon do al Jelena pro medalo kaj ... nu bone. Gratulon al Men's Health (kazaĥa eldono) pro la talenta talent-malkovro. Gratulon al la honor-riĉa kazaĥa nacio.