Kelkaj bazaj datumoj pri Vanselow oni jam de iom da tempo trovas en Vikipedio. Nun Roland Schnell kreis propran retejon en la germana, la "Vanselow-projekto", kiun mi nepre rekomendas al vi, eĉ se vi ne komprenas la germanan - vi ja komprenos la bildojn.

Vanselow i.a. eldonis revuon "Sekso kaj socio" por "partopreni en la grandaj reformoj de nia epoko en la demandoj de sekso kaj socio". Li estis eldoninto de kaj poste fotisto por la revuo "Ideala Nudeco. Naturaj fotoj de homa korpa beleco". La konata Esperanto-aŭtoro Jan Fethke (vd. ankaŭ mian biografion en tiu ĉi blogo) varbis lin por Esperanto kaj helpis al li ekhavi malgrandajn rolojn en filmoj de la 1930-aj jaroj. "Skandalo" en la berlina socio antaŭ 1914 estis liaj "Festoj de Belecoj", kiujn li aranĝis i.a. en Werder, malgranda urbo ĉe la rivero Havel, ĉ. 40 km sudorienta de Berlino. En grandega nobla vilao apud lago altranguloj renkontiĝis por festi naturan vivon kaj belecon. Sed rigardu mem en la retejo de Roland ...

P.S. Nur malmultajn spurojn de Karl ni havas inter 1915 kaj 1945. Tre probable li vivis en itallingva Svisio aŭ Italio. Antaŭdankon por ĉiu plia puzlero de lia vivo, precipe dum la intermilita periodo.