Group: ENTRY

Elestonigis Hilda DRESEN
El Sonetoj, Chapecó: Fonto, 1988, p. 34

--------------------------------------------------------------------------------
Neĝvojo blanka jen alvale gvidas,
briletas tie fenestreto sola —
kvieta voj' — senhoma kaj izola:
tintilsonore sled' laŭ ĝi ne glitas.

Ĉe l' fin' pordego blanka. Min incitas
kaj tente logas ĝi: per paŝ' nevola
mi tie ofte vagas senkonsola,
kaj dum ĉi ir' malgaje mi meditas.

Pordego blanka sur neĝblanka ter',
dum nokto blanka — venis la stelar',
sur volbon vian klinas sin la luno —

vi nin disigas de la mortosfer'.
Ĉi-flanke mi. Ĉu baldaŭ per fanfar'
min oni vokos al la blanka lumo?...