Hans-Georg Kaiser
Laste
Iu bruligos la lastan kandelon.
La libroj pri historio estos fermitaj.
La lastaj manuskriptfolioj de ermito,
kiu preterdormis la mondopereon,
estos disblovitaj de l' vento.
Ĝis ankaŭ tiuj disfalos.
Kie estis historio, tie
tiam nur plu staros ruinoj
kun ridindaj monumentoj
aŭ urboruinoj de robotoj,
ĝis ankaŭ tiuj malaperos
en granda frida dezerto.
Neniuj infanoj estos plu naskataj,
ĉar ne plu estos homoj.
Neniuj robotoj plu regos homojn,
ĉar ne plu estos robotoj.
La civilizacio, la multe glorata kaj adorata,
malaperos kun ĉiuj siaj atingoj
pro la nevitebla eterna ŝanĝo de ĉiuj aĵoj,
ĝi estos estingita el ĉiu memoro,
longe antaŭ ol malaperos
ankaŭ la planedo Tero
kaj poste la universo
kaj poste...
Sign-in to write a comment.