Jen kaj jen oni legas iujn indikojn pri la nombro de "vortoj" en Universala Vortaro (UV). Se ni volas scii la nombron de la Fundamentaj lingvo-elementoj, tiaj indikoj ne multe helpas. Ni ja bone scias, ke ni havas tutan serion de vortoj, uzataj nur en la Ekzercaro (FE) kaj la Antaŭparolo (A), sed ne registritaj en UV, tamen tute samrange "Fundamentaj".

Se ni mencias la Antaŭparolon, ni tuj pensas pri la klasika diskuto, ĉu la Antaŭparolo estas samrange lingvo-normiga kiel UV, FE kaj la kvin Gramatikoj (FG) aŭ "nur" meta-plano. Ni do jam vidas, ke nia nombro ankaŭ dependas de tio, kiujn tekstojn el la tekstaro "Fundamento" ni konsideras.

Plia difinenda punkto estas la um-vortoj. Ĉu ni konsideras ilin kunmetaĵojn kaj do ne nombras ilin aparte aŭ ĉu ili laŭ nia konvinko estas apartaj, memstaraj vortoj nombrendaj? Aŭ eĉ foje nombrendaj, foje ne. - Kio?

Nu, rigardu. Relative simple estas pri elementoj de tiu tipo:

● brul’um’ - inflammation | inflammation | Entzündung | воспаленіе | zapalenie [UV brul’].

● buŝ’um’ - muselière | mouth-basket | Maulkorb | намордникъ | kaganiec [UV buŝ’].

● buton’um’ - boutonner | button | zuknöpfen | застегивать | zapinać [UV buton’].

● gust’um’ - goûter, essayer | taste | kosten, schmecken | отвѣдывать | kosztować, próbować [UV gust’].

Ni simple devas unu fojon difini por la tuta grupo, ĉu ili estas nombrendaj aŭ ne. Sed kion pri tiu:

● kalkanum’ [OA 1] * talon (chauss.) | heel (of a shoe) | каблукъ | Absatz | obcas.

Ĉu nombrenda aparta radiko aŭ ĉu rigardenda kiel la Fundamenta radiko kalkan’ kun la sufikso -um’' kaj do ne aparte nombrenda?

Kaj fine ankoraŭ ekzistas la "Aŭgusto-vortoj", nome (eblaj) homonimoj (samformaj vortoj kun malsamaj signifoj):

Aŭgust’ - Août {2012: août} | August | August | Августъ | Sierpień. — {Vd. la rimarkon ĉe Aǔgusto}. — [RE].

Aŭgusto ― Aŭgusto estas mia plej amata filo [FE 22.11, mankas en UV]. — Aŭgust’ {deklarita Fundamenta per} [OA 7] (vira antaǔnomo). — [DL 1888]: Aŭgusto estas bona, Mario estas pli bona ol Aŭgusto, sed Ernestino estas la plej bona el ĉiuj miaj gefratoj [DL 2.11]. — Rim.: Estas dube, ĉu la monato-nomo Aǔgust’ [UV] kaj la vira antaǔnomo Aǔgusto [FE 22.11] estas unu elemento kun du malsamaj signifoj aŭ du malsamaj, sed (hazarde) samformaj radikoj (homofonoj). Niaopinie temas pri du elementoj. Alikaze ne estus necese, ke [OA 7] deklaris la antaǔnomon Fundamenta. La monato-nomo ja ĉiukaze aperas en la ĝusta alfabeta vico en UV.

De tiaj okazoj estas pluraj. Jen ekzemple:

pik’ - piquer; Pique | prick, sting; spade | stechen; Pik (in Karten) | колоть; пика | kłuć; pik. {LUD} — [AK] {en} prick, sting; spade (cards) | колоть; пика (в картах). — Rim.: Diskuteble, ĉu temas pri unu aǔ du vortoj, nome la verbo pik-i kaj la homonima substantivo pik-o (en kart-ludo).

piked’ - piquet | picket | Piquet {2012: Pikett} | пикетъ | pikieta. {LUD} {MIL} — [AK] piquet (milit. et jeu de cartes) | picket (milit.), piquet (cards). — [RE 133]. — Rim.: Diskuteble, ĉu temas pri unu aǔ du vortoj, nome la iama franca kart-ludo kaj la iama malgranda taĉmento de soldatoj.

Laŭ PIV 2005 la kart-ludo pikedo kaj la soldata taĉmento pikedo estas du vortoj (miaopinie prave). Kontraŭe la kart-speco piko aperas en la artikolo pri piko (en la senco de pikado de piki) (miaopinie malĝuste). Ankaŭ la vira nomo kaj la monato Aŭgusto estas klarigitaj en unu artikolo (miaopinie malĝuste). La greka diino kaj la stel-konstelacio Andromedo: unu artikolo (hm, hm), la planto andromedo aparta artikolo. La konstelacioj Aglo kaj Baleno aparte traktita de la bestoj aglo kaj baleno. Kiel oni vidas, konsekvenca trakto de la demando ne ekzistas. Tio kutime ankaŭ ne tre gravas.

Gravas nur, se oni nombras. Sen detala difino, kion oni kiel konsideras, ĉiu preciza nombro estas pli-malpli fantazia. Ĝi ŝajnigas precizecon, kie precizeco ne ekzistas. Kaj tiel ankaŭ staras la afero pri la "statistikaĵoj" en la retejo de la Akademio. "4953" bazaj elementoj en la Vortaro Oficiala ĝi asertas, sen eĉ diskuti la demandon pri - ekzemple - pik' kaj piked'. Serioze ni restu ĉe "iom malpli ol 5.000" aŭ "ĉ. 4950".