Se oni rajtas fidi Vikipedion, ĉ. 60 elcentoj el la 3,4 milionoj da berlinanoj estas senkonfesiaj, ĉ. 20 elcentoj luteranoj, malpli ol 10 % katolikoj kaj pli ol 7 % islamanoj. Tradicie en Prusio kaj Berlino de post la reformacio la popolo estis luteranoj, la korteganoj kaj altaj ŝtat-oficistoj kalvinistoj. Katolikaj precipe estas enmigrantoj, nuntempe ĉefe poloj kaj homoj el latinidaj landoj (italoj, hispanoj, sudamerikanoj ktp.) kaj kompreneble germanoj el katolikaj regionoj en la sudo kaj laŭlonge de la Rejno. La nuna papo mem venas el Bavario.
La vizito okazos nur jaron post grava skandalo pri seksa misuzo de precipe knaboj per katolikaj pastoroj kaj edukistoj, kiu komenciĝis en privata katolika lernejo en Berlino. De tie ĉi la malkovroj pri plej aĉaj krimaj faroj pli kaj pli etendiĝis al ĉiam pli da katolikaj lernejoj kaj komunumoj. Ĉe la pinto de la skandalo, daŭrinta dum monatoj, pli kaj pli da homoj demandis, kial la germana ŝtato daŭre devas kunfinanci la katolikan eklezion surbaze de la hitlera konkordato kun la Vatikano. Multaj postulis pli striktan disigon de ŝtato kaj eklezio laŭ franca modelo. La kredantoj pagu mem por sia eklezio. Per nerektaj impostoj kaj ŝtataj subvencioj pagigi ne- aŭ alikredantoj estus kontraŭ-demokratia.
Ke nur jaron poste la papo intencas veni al Berlino laŭ invito de la (katolika) federacia prezidento, multaj rigardas provokon, ankaŭ en la parlamento. "Kial reprezentanto de iu ajn religio aŭ konfesio entute parolu en la federacia parlamento?", demandas precipe parlamentanoj de la maldekstro kaj anoncas, ke ili ne ĉeestos la parolon.
La Vatikano kompreneble bone konscias, ke la papo ne vojaĝos sur amikan terenon. Kiam la pola papo Johano Paŭlo la 2-a vizitis Berlinon en 1996, sur la "papomobilo" estis ĵetitaj tomatoj kaj duonnudaj gejoj dancis laŭlonge de la vojo postulante pli da rajtoj. "Kontraŭ-papino" estis proklamita. Publika meso en la Olimpia Stadiono (ĉ. 75.000 lokoj) estis nur iel-tiel plena pro la multaj polaj kredantoj, alveturigitaj de trans la limo. Ĉi-foje estas antaŭvidita meso nur sur la multe malpli granda placo antaŭ la kastelo de Charlottenburg. Sed eĉ 75.000 vizitantoj ne tre impresas en urbo, kie ĉiun novjaron kolektiĝas pli ol miliono antaŭ la Pordego de Brandenburgio nur por festi jarŝanĝon.
Kontraŭuloj intertempe sin organizas. Inter ili estas la granda komunumo de samseksemuloj (unu el la plej granda en Eŭropo), kiu postulas "klaran vorton de la papo, ke samseksemo ne estas peko". La ligo de infanoj seksperfortitaj en jezuitaj lernejoj kaj katolikaj edukejoj postulas, ke la parlamento unue akceptu delegacion de viktimoj antaŭ ol akcepti la papon.
La planitaj vojaĝoj de la 84-jarulo en junio al Kroatio (85% da katolikoj) kaj en aŭgusto al Madrido probable fariĝos pli agrablaj ol la vizito en la nordaj sendiaj marĉoj.
Aliflanke, se Berlinon vizitus iu triamonda diktatoro kun la homa sango disgutanta de la manikoj, neniu el la homrajtistoj eĉ rimarkus la okazaĵon.
Mi memorigu, ke Miĥail Gorbaĉov, dum sia oficperiodo kiel prezidanto de Sovetunio sendis tankojn kaj armitajn soldatojn kontraŭ la surstrate protestanta loĝantaro de Litovujo. Estis multaj viktimoj.
La samaj kontraŭpapaj berlinanoj aplaŭde igis s-ron Gorbaĉov honora urbano. Neniu protestdancis duonnuda.
En la sama homrajtema Berlino ekzistas multaj stratoj portantaj nomojn de Karl Marx, Friedrich Engels, Rosa Lŭemburg ktp, sed eĉ neniu tiun de Ronald Reagan, kiu tamen ludis ĉefan rolon en la malkonstruo de la muro.
Bernardo has replied to Milokula KatoTiu situacio (en malpli forta grado) ankaŭ ekzistas en la iama okcidenta Germanio (la t.n. "kristnasko-kristanoj", ĉar ili pro tradicio vizitas preĝejon unufoje jare dum kristnasko, sed cetere havas apenaŭ ligon al ĝi). Kio ajn la kaŭzo mi ne vidas ŝancon je rekristanigo en Germanio - kaj en la nordo, la hejm-lando de la reformacio (en 2017 oni festas 500-jaran jubileon) certe ne per katolikismo, sed - se entute - per iuj protestantaj eklezioj.
Sed se estas tia malgranda malplimulto, kial la papo parolu por ĉiu homoj kiel iu morala instanco? Kial ne gvidanto de protestanta eklezio, kial ne islama gvidanto?
Se venus triamonda diktatoro, oni ne lasus paroli lin en la parlamento nek en publika placo. La publika televido se entute nur mencius la viziton rande, homoj apenaŭ konsciiĝus pri la afero. Ĉe la papo estas alie. La oficiala argumento ja estas, ke li parolos kiel ŝtatestro (!) de Vatikano. Sed tiu maldemokrata "ŝtato", kiu ne respektas homajn rajtojn, ne eĉ povus - ekzemple - fariĝi membro de EU. Kial doni al tia ŝtatestro la honoron paroli en la parlamento?
Pri la multaj stratoj daŭre nomataj laŭ komunistoj mi persone tute konsentas kun vi. Sed tio laŭ mi estas alia temo.
Cetere, vi pravas, ke la gehomoj preferas simbolojn kaj simbolulojn : ĉu por adori, ĉu por maladori, kiel ĉi-kaze.
Iuj volas esti egalrajtaj kaj nejuĝataj. Tamen kiel ili mem kondutas?
Foje mi pensas, ke indus bredi kelkdekon da razkapuloj ie fore, eksterurbe por venigi ilin laŭokaze montri la "diversecon de opinioj" al tiuj, kiuj volas esti "plej egalrajtaj".
La katolika Pollando estis kaj restas katolika.
La tiama GDR plurestas plejparte ateisma, parte ankaŭ lastaspirluterana.
En Bavario la katolikaj tradicioj estas tre fortaj, kaj la protestanta malplimulto ankaŭ fartas sufiĉe bone. Tio iomete fuŝas la statistikon.
Ĉu hazarde ke ankaŭ la ekonomio tie estas pli forta? Ankaŭ ĉio: la popolaj kutimoj, kantoj kaj vestoj estas pluflegataj, malsame al la "moderna" cetero de la germanaj landeroj.
Bernardo has replied to Milokula KatoKiom ajn krude sonus la aserto, tamen foje ŝajnas al mi ke ĝi estas prava: la roloj de katolikismo kaj la tradicia (!) protestantismo iel inversiĝis.
Jes, Siemens (kaj Bayer + MAN + Eurocopter) ludis sian rolon, tamen Bavarion vivigas ankaŭ la vilaĝanaro.
Ĉiujn popolon distingas nur religio kaj/aŭ lingvo. Sed bezonoj de ĉiuj samas, do la tuta homaro povas esti ununura popolo. Se oni neglektas lingvan kaj religian demandon.
Novtempe eĉ tio ne gravas: mondo dividiĝis nur al du "specioj" - monhavaj kaj malriĉaj. Nenio alia gravas - riĉulo povs paroli nenian lingvon - lia mono parolas anstataŭe, kaj malfermas mil pordojn. Tute sendepende kiun religion apartenas subjekto. Inverse, malriĉulo povas paroli cent lingvojn, aŭ aparteni al iu ajn ebla religio - ne taŭgas por malfermi iun pordon en moderna mondo.
Sign-in to write a comment.