Malfacile diri, kien klaki unue. Mi hazarde elektis la rubrikon "kulturo" kaj la subrubrikon "teatro". Jen foto de la teatraĵo "Ĉu Dio bojas?", Figeac 1981 kun la franca grupo "Krizalido". Jen "Gastamo", Zagrebo ĉ. 1981 kun mojose juna Zlatko Tišljar, prezidanto de IKS, kiel "la gasto". Jen Arno kaj Solen Lagrange en "La evento", Internacia Esperanto-Teatrofestivalo, Budapeŝto 1982.

Kion pri "literaturo"? Jen du fotoj de Julio Baghy, jen ok de Kalocsay, jen polaj Esperanto-poetoj 1921, jen rusaj. Nek mankas la lasta foto de Kalocsay kun Ada Csiszar, nek tri de la 75-a naskiĝ-tago de Jan Fethke (Jean Forge) 1978 en Berlino kun Ina Tautorat. 80-jara Hilda Dresen (1976) apartenas al la pli konataj kaj jam ofte viditaj fotoj, sed juna William Auld en 1948 jam estas malpli bone konata, nudventra Fritz Ström kun Ferenc Szilagyi en iu sveda arbaro certe estas raraĵo.

Filmo. La svisa mondmigranto Joseph R. Scherer kun filmstelulino Lupe Velez, Hollywood 1930. Velez tenas Heroldon de Esperanto en la mano. Fred Niblo, reĝisoro de i.a. Ben Hur 1925, kun Scherer.

Neelĉerpebla trezoro pri "personoj". Jen Frederic Pujulà i Vallès kaj Jaume Grau Casas, du el la gravaj katalunoj, ambaŭ ĉ. 1940. La dana nestorino Margrethe Noll, 1943. K.t.p. ktp.

Nu, kaj tiel 10.000 fotojn plue. Faru vian propran esplor-vojaĝon kaj retrovu malnovajn amikojn, kies romanojn vi ŝatis, kies artikolojn aŭ poemojn vi legis. Foliumu en Bildarchiv Austria kvazaŭ kiel en via privata foto-albumo. Se vi emas, atentigu nin malsupre pri viaj plej ŝatataj malkovroj.