Katzer prezentas informojn kaj multajn fotojn de 117 diversaj plantoj, el kiuj oni produktas spicojn. Li fokusiĝas je la uzo de spicoj en la tradicia kuir-arto de multaj popoloj, precipe tiuj vivantaj en Azio. Li traktas la historion kaj la kemiajn substancojn, troveblajn en la spico-plantoj, same kiel la etimologion de la planto-nomoj - kaj li dankinde aldonis la esperantajn terminojn.

La plantojn kaj spicojn oni trovas per serĉo-funkcio, laŭ la indeksoj germana kaj angla aŭ laŭ multlingva indekso, kiu ankaŭ registras la esperantajn tradukojn. Krome ekzistas indeksoj geografia (laŭ la distribuo de la plantoj), botanika (laŭ la scienca klasifo) kaj morfologia (ĉu la spico estas produktita el la radiko, folioj, semoj, fruktoj ktp.) kaj ankoraŭ aliaj, kies malkovron mi lasas al via scivolemo.

La kelkaj malmultaj testoj, kiujn mi faris, donis ĝustajn rezultojn por la esperantaj terminoj - sed por esti sincera kaj honesta: Mi neniel kompetentas pri la fako. Eĉ en mia plej forta lingvo mi probable apenaŭ povas distingi dekduon da spicoj. Ĉar vi certe povos multe pli bone prijuĝi "Gernot Katzers Gewürzseiten" mi invitas vin, informi pri via impreso en komentoj. Spicitan antaŭdankon!