Laŭ la naskiĝ-dokumento la viro nomiĝas Karl-Theodor Maria Nikolaus Johann Jacob Philipp Franz Joseph Sylvester Freiherr von und zu Guttenberg, mallonge kaj ĉiutage nomita Karl-Theodor zu Guttenberg. Iu ŝercemulo en Vikipedio simple aldonis inter Philipp kaj Franz iun inventitan Wilhelm. Kaj ĉiuj, senescepte ĉiuj, erarige tiel nomataj "kvalitaj gazetoj" de la moderata dekstro ĝis maldekstro de mia kara landeto sen iu kontrolo kopiis tiun intence eraran informon el Vikipedio, furz-egale ĉu Handelsblatt, taz, FAZ, Süddeutsche Zeitung, Rheinische Post kaj kiel ili ĉiuj nomiĝas. Plej stulta - malmulte surpriza - denove kaj kiel kutime Spiegel, la plej ofte kopiita semajna magazino kaj la amas-ĵurnalo Bild (la plej disvastigita kun la nudaj virinoj sur ĉiu dua paĝo). Kaj la televid-ĉenoj obeeme kaj ŝafece sekvis: Vilhelmo ĉie kaj super ĉio. Neniu ĵurnalisto eĉ nur ekdubis, kvankam kun iom da scio pri germana kulturo oni devus suspekti, ĉar Vilhelmo originas el la nordgermana, precipe prusa tradicio (kp. la imperiestron Vilhelmo la 2-a), dum Guttenberg estas el sudgermana, nome frankonia familio en norda Bavario (kie nomoj kiel Philipp, Franz, Joseph, Sylvester estas tipaj, dum ekzemple Nikolaus ankaŭ povus esti nomo el la nordo; Vilhelmo do fremdas en la vico).

Nu, kial je ĉiuj diabloj la hodiaŭ iom nekutima nomo de politikisto entute estas temo, se li devos lukti kontraŭ la plej danĝera ekonomia krizo de jardekoj, minacanta la vivon de miloj kaj miloj da familioj. Nu, se "ili" jam pensas, ke tiu randa temo estus pli grava ol la ideoj de la nova ministro pri la ekonomia krizo, kial ili ne ... - sed egale, la tempo-manko, la ekonomia premo en la ŝrumpanta merkato de gazetoj, la subtera kaj profunde nokta, ĝenerala kulturo de multaj ĵurnalistoj ktp. ktp.

Simple kredu nek al ili nek al Vikipedio. Thomas Bernhard probable estus rekomendinta: Se entute, legu NZZ.

Jen la afereto por tiuj, kiuj komprenas la germanan: Wie ich Freiherr von Guttenberg zu Wilhelm machte.

"... gazetojn havigi al mi kaj legi ilin kaj ĉiam esti forpuŝita de ili naŭzite."

Daŭre agrablan falsadon de Vikipedio al ĉiuj.