• Gabrielo Bálint, unua firma pioniro de Esperanto multe vojaĝinta
  • Paŭlo Lengyel, pioniro, presisto, kiu savis la revuon "Lingvo Internacia" en kriza periodo, kiu restadis en Parizo de 1904 ĝis 1919 kaj tie fondis Esperanto-presejon "Presa Esperantista Societo", bedaŭrinde malliberigita en Francio dum la unua mondmilito eĉ se povis eble iom konsoli lin la fakto ke du el liaj gardistoj scipovis Esperanton...
  • Julio Baghy, unu el la plej famaj Esperanto-verkistoj
  • Kolomano Kalocsay, verkisto, poeto, gramatikisto, vortaristo, ĉefredaktoro de "Literatura Mondo"...
  • Andreo Cseh, kies instrumetodo de Esperanto famiĝis kaj estas ankoraŭ nun uzata.
  • Francisko Szilágyi, kiu, same kiel Andreo Cseh, gvidis multajn kursojn tra Eŭropo.
  • Paŭlo Balkányi, kiu aktivis energie sur diversaj terenoj.
  • Géza Bárczi, lingvisto, membro de la Hungara Scienca Akademio.
  • Alfonso Pechan, universitata profesoro, leksikografo, vortaristo, aŭtoro de tre valora "Gvidlibro Por Supera Ekzameno — Historio, Literaturo, Metodologio"
  • István Szerdahelyi, kiu tre alte levis la pozicion de Esperanto en universitata medio kaj ĝenerale en instruado.
  • Karlo Fajszi, unu el la plej famaj, interesaj kaj agrablaj esperantistoj, kiujn mi iam renkontis, kies kolekto da Esperantaĵoj estis vere eksterordinara. La hungara ŝtato aĉetis ĝin por transdoni al la Tutlanda Fremdlingva Biblioteko de Hungario.
  • Zsuzsa Barcsay tro frue malaperinta (1942-2000) promesplena instruinspektoro de hungara edukministerio, kiu gvidis multajn kursojn.

El tiu strebo rezultis ke la hungara instrusistemo estas la plej malfermita en la mondo al instruado de la Internacia Lingvo, kaj nun hungaraj esperantistoj plue tenas la torĉon alte, ne nur en Hungario :

  • D-ro Ludoviko (Lajos) Molnár kaj lia edzino Julianna Farkas, ambaŭ multflanke aktivaj i.a. kadre de la Budapeŝta Medicina Esperanto Fakgrupo
  • István Ertl, iama redaktoro de la revuo "esperanto" de UEA, ĉiam aktiva.
  • Zsófia Kóródy, iam profesorino pri la angla, la hungara kaj Esperanto en fama budapeŝta liceo kaj nun forte kontribuanta al la vivo kaj famigo de la "Esperanto-Urbo" Herzberg am Harz.
  • György Nanovfszky, Eks-ambasadoro de Hungario en Moskvo kaj poste Singapuro, eksa prezidanto de Hungara Esperanto-Asocio. Profesoro en AIS.
  • Tibor Magyar — hungara diplomato ekde 1986, en Singapuro ekde 2001.
  • La familio László Polgar, kies filinoj Suzanna, Zsófia kaj Judit estis famaj ĉampioninoj de ŝakludo.
  • Bertalan Farkas, la unua hungara kosmonaŭto, eble la sola en la mondo iam lerninta Esperanto (kun Jozefo Horváth).
  • Jozefo Horváth iam tre aktiva pri E-instruado, aŭtoro de tre originala lernolibro "30 nap alatt eszperantóul" (Esperanto en 30 tagoj)
  • István Nemere — Dulingva verkisto, aŭtoro de multaj romanoj en la hungara kaj Esperanto.
  • Katalin Kováts (antaŭe Smidéliusz) kiu zorgas pri unu el la plej utilaj retejoj de la Esperanto-mondo "Edukado.net".
  • Ilona Koutny, kiu iniciatis kaj gvidas interlingvistikajn studojn ĉe la Universitato Adam Mickiewicz en Poznań, en Pollando.
  • László Szilvási, kiu respondecas pri la Esperanto-Centro Eventoj en Hungario, Ret-Info, treege utila centro de informado kaj dokumentado, kiun mi cetere ne malofte uzas ;-)
  • Aleks Kadar, estrarano de Esperanto France de 2006 ĝis 2010, ties prezidinto en 2009-2010. Fakte li havas iom da hungareco pro tio ke lia patro, kvankam sen hungara nacieco, naskiĝis en Hungario kaj havas tipe hungaran nomon ;-)
  • ktp : longega listo aperas ĉe "Hungaraj esperantistoj".

Certe estas multe pli; la forgesitaj bonvolu senkulpigi min pro tempomanko por plua serĉado. Eĉ se temas pri "

malgranda fina venko

", tio estas tamen stimula kaj inspiroporta. En Hungario, eblas trapasi :

  • abiturion en Esperanto
  • ekzamenon por eniri la universitaton
  • la KER-ekzamenojn en la hungara landa lingvo-centro ITK

Plej laste,

László Gados

klopodas je sia nivelo por akceptigi Esperanton en Eŭropa Unio.

Li engaĝiĝis en europan informagadon

. Li konsekvence kaptis la okazon de la transpreno de la eŭropa prezidenteco fare de Hungario por uzi Esperanton en informado : vd lian blogon "

Aktualaĵoj en la Eŭropa Unio

" en kiu li komencis dediĉi paĝojn pli speciale al la "

unua hungara prezidanteco en la Eŭropa Unio 2011

" (miaopinie pli taŭgus "prezidenteco", ĉar temas pri funkcio de komuna prezidento por grupo da unuiĝintaj ŝtatoj).

Estis ĝis nun malmultaj iniciatoj ligitaj al apartaj prezidentecoj de EU. Tro ofte ili estis preskaŭ nur unuopaj. Certe

Eŭropa Esperanto-Unio

devus ludi pli grandan rolon en stimulado kaj kunordigado de iniciatoj en la senco de laŭŝtupa akceptigo de Esperanto en EU. Interrete restas spuroj pri kelkaj pozitivaj iniciatoj, i.a. pri iama prezidenteco de Finnlando ĉe EU, kiam aperis informbultenoj

Conspectus rerum Latinus 18/2006

en Esperanto-traduko, tio ĉefe dank' al Tim Morley (timsk). Kiam Slovenio transprenis la prezidentecon, Zlatko Tiŝljar kaptis la oportunaĵon por montri ke eblas inform(iĝ)i per Esperanto sen kono de la lingvo de la lando de la prezidento, aŭ de la tri "superaj" lingvoj de EU, aŭ de la supera al la superaj — la angla —, uzataj en Bruselo.

Ĉar ni devas laŭeble ligi la informadon pri Esperanto al aktualaj konkretaĵoj, mi iam sugestis pli da atento al tiuj transprenoj de prezidenteco, eĉ se kreskas la nombro da homoj, kiuj pli kaj pli malŝatas tiun nedemokratan burokratan unuiĝon de ŝtatoj, kies planadon kontrolis Usono kaj CIA por ke ĝi neniam fariĝu pli potenca ol Usono kaj por ke ĝi restu dependa de ĝi.

Bedaŭrinde, la hungara prezidenteco komenciĝis tre malbone pro la sinteno de

Viktor Orbán

rilate al la hungaraj amasinformiloj, pro kio protestoj kaj akraj kritikoj aperis en multaj landoj. Jen plia kialo por esti viglatentaj pri tio kio okazas kaj okazos en Hungario kaj en EU.

Por ebligi kaj faciligi pli bonan planadon kaj preparadon de estonta agado kadre de EU, kalendaro pri la pasintaj, nunaj kaj estontaj prezidentecoj estas trovebla ĉe : "

Toute l'Europe.EU

" (La tuta Eŭropo.EU). Jen ili ekde la nuna :

  • Hungario — jan. - jun. 2011
  • Pollando — jul. - dec. 2011
  • Danio— jan. - jun 2012
  • Kipro — jul. - dec. 2012
  • Irlando — jan. - jun 2013
  • Litovio — jun. - dec. 2013
  • Grekio — jan. - jun 2014
  • Italio — jul. - dec. 2014
  • Latvio — jan. - jun. 2015
  • Lukemburgio — jul. - dec. 2015
  • Nederlando — jan. - jun 2016
  • Slovakio — jul. - dec. 2016
  • Malto — jan. - jun. 2017
  • Britio — jul. - dec. 2017
  • Estonio — janvier - juin 2018
  • Bulgarie — jul. - dec. 2018
  • Aŭstrio — jan. - jun. 2019
  • Rumanio — jul. - dec. 2019
  • Finnlando — jan. - jun. 2020

Konklude : Pollando jam prepariĝu por fari ion grandiozan ! ;-)

Pri László Gados