Dum pluraj monatoj, mia filo laboris en la plej granda atomcentralo en Eŭropo (en Gravelines, apud Dunkirko, en la departemento Nordo de Francio, kie ni loĝas), kaj ni multe timis, kiam li devis interveni proksime al la kerno de unu el ĝiaj reaktoroj.
Feliĉe, li havas nun alian funkcion, kiu tute ne plu rilatas kun la atomindustrio.

Kompreneble, ne en kelkaj monatoj aŭ eĉ jaroj, ni povus eliri el tiu energiformo. Tamen atomo estas pli problemo ol solvo, mi opinias. Niaj antaŭuloj heredigis al ni mirindajn katedralojn; ĉu ni heredigos al niaj infanoj ruinigitan planedon, kaj nesolveblajn problemojn (ekz. kiel kontroli atomindustriajn restaĵojn dum pluraj jarcentoj???)
NB : Mia lando posedas 58 atomreaktorojn (en 19 centraloj) !!!

Antauhieraŭ (14an de marto) raportis el Japanio HORI YASUO :

" En Japanio troviĝas ĉirkaŭ 60 nukleaj fornoj. La konstruadojn iniciatis tiama Liberala Demokratia Partio, la kapitalista mondo kaj elektro-kompanioj, ĉiam mensoge insistante la sekurecon kaj frapante la vangojn de kontraŭantoj per faskoj da bankbiletoj. Japanio estas vulkana lando kaj situas sur la granda nesto de tertremoj, do estas tute klare, ke konstrui nukleajn centralojn en tiu insularo estas danĝerege, sed mono regas la mondon. Por profiti, ili faras ĉion, kaj la rezulto venis hodiaŭ. (mi substrekas)

Mi longe opinias, ke Japanio ekspluatu sunenergion anstataŭ atom-energio. Japanio havas sufiĉe altan teknologion por tio, kaj se ni sukcesos tion, ni povos gvidi la tutan mondon en tiu kampo. Tamen la industria mondo ne havis tiun perspektivon kaj direktis sin al mono, kiu vidiĝis ĝuste antaŭ iliaj okuloj. Mi deziras, ke Japanio nuligu ĉiujn nukleajn centralojn kaj direktu sin al pli sana energio. Dume ni havos malfacilon, sed tiu direkto vere garantios feliĉon al ĉiuj popolanoj kaj al la mondo."