La aproj estas la hororo de la posedantoj de belaj familiaj domoj kun eĉ pli belaj kaj zorgitaj ĝardenoj en la urbo-randaj distriktoj de Berlino. Diligenta aro de aproj eĉ ne duonan horon bezonas por ŝanĝi mez-grandan ĝardenan perlon en - por ili - agrablan kotejon. Pordeto en la barilo ĉirkaŭ la ĝardeno? Neniu problemo por la inteligentaj bestoj, kiuj ofte scias pli bone malfermi ĝin ol hundoj.

Vulpojn oni povas observi eĉ en la urbo-centro. Ili vivas ekzemple sur larĝa strio de la iama Muro, kiun la urbo deklaris "parko". Pro mono-manko tamen, ĝi fakte lasas la naturon simple rekonkeri la terenon. Kaj surprize rapide la naturo akceptis la defion. Sur mallarĝaj padoj oni povas promeni tra tiu nove ekestanta "pra-arbaro".

La larĝan spacon ĉirkaŭ la konata Alexandro-Placo malkovris falkoj kaj aliaj rabo-birdoj kiel enurba hejmo. Klasika jam estas la granda populacio de sciuroj sur multaj Berlinaj tombejoj, kiuj ofte similas al verdaj parkoj kun multaj maljunaj arboj. Fakte sciuroj tie ĉi estas eĉ pli oftaj ol en normalaj ekster-urbaj arbaroj en Germanio.

Aparte ŝatata de natur-protektantoj estas la multaj enurbaj vespertoj. Deksep el inter dudekkvin specioj vivantaj en Germanio oni trovas en Berlino. Kvin specioj restas eĉ dum vintro, dormante en iuj el la multaj forgesitaj katakomboj de la subtera urbo, kie ili apenaŭ estas ĝenitaj de homoj.

En la Muzeo pri Natur-Sciencoj antaŭ kelkaj tagoj estis malfermita tiutema ekspozicio "Biopolo - sovaĝa Berlino" (ĝis 2012-02-26). Se vi ne sukcesas viziti ĝin, vi anstataŭe povas viziti nin en somero: vulpon kaj vespertojn ni regule vidas de sur nia balkono.