"La ideo evoluas jam tridek jarojn, kaj antaŭ kelkaj semajnoj mi malfermis la ipernity-paĝaron de DEC, por povi al la publiko prezenti kion DEC posedas, kion ĝi celas, kiel ĝi funkcias", sinjoro Pleadin skribas.

Apenaŭ pli kapabla aktivulo penseblas. Josep Pleadin estas la aŭtoro de la konata "Biografia leksiko de kroatiaj esperantistoj" (2002) kaj pro tio unu el la plej bonaj fakuloj de la Esperanto-historio en tiu relative malgranda lando, kiu tamen grave kontribuis al la internacia Esperanto-Movado. La plej konatan esperantiston el Kroatio vi certe konas - Ivo Lapenna. Nu bone, tiun "oficialan" foton de Lapenna vi certe foje jam vidis, sed ĉu vi konas ankaŭ tiun de juna Lapenna en bankostumo kune kun Emilija Heiligstein Lapenna kaj zagrebaj esperantistoj?

Jam nun, ankoraŭ tute komence de la agado de DEC troveblas pli ol 130 fotoj en ties Ipernity-arkivo: Jen maljunula foto de la fama Marinko Gjivoje, i.a. aŭtoro de la gvida kroata vortaro dum longaj jaroj (ĝia posteulo nun estas tiu de sinjorino Borĉic) kaj multaktivulo sur internacia scenejo. Jen foto de la kroata esperantisto Ilija Puhalo kun Edmond Privat en Svislando (almenaŭ la lastan vi certe konas, i.a. la aŭtoro de la klasika biografio pri Zamenhof). Jen foto pri la Universala Kongreso en Dancigo en 1927.

Preskaŭ egalas, kien vi klakas, ĉie vi trovas interesaĵojn, foje amuzaĵojn. Kun danko al sinjoro Pleadin mi kore invitas vin al promeno tra la Kroata Esperanto-Arkivo, nomita Dokumenta Esperanto-Centro.

P.S.: Pliajn dokumentojn vd. en la grupo "Historio de la Esperanto-Movado".