Jen la citaĵo el ED 4, 1906, p. 67 (mia substreko):
________________________________________________________________________

[4] Mi devas diri ankaŭ kelkajn vortojn pri mia persona rilato al la ambaŭ komitatoj. Pro la nunaj cirkonstancoj en mia patrujo, kiuj iafoje por longa tempo detranĉas min de la tuta mondo esperantista, kaj parte ankaŭ pro la stato de mia sano, kiu nun jam ne permesas al mi tiel multe labori eksterprofesie, kiel antaŭe, mi ne povas nun aktive partoprenadi en la laboroj de la ambaŭ komitatoj elektitaj de la Kongreso [Lingva Komitato (LK) kaj Konstanta Kongresa Komitato (KKK), provizore elektitaj de UK 1 en Aŭg. 1905].
_______________________________________________________________________

Fine de kurso pri FdE, ĉiu partoprenanto devus esti kapabla respondi la demandon:

1. Klarigu, al kiuj "cirkonstancoj en mia patrujo" Zamenhof alludas en tiu letero.

Jen ebla respondo:

De Feb. 1904 ĝis Sep. 1905 okazis la rusa-japana milito pri la regado en Manĉurio (nuntempe nord-orienta Ĉinio) kaj Koreio, kiun Japanio venkis. Komence de 1905 Zamenhof estis mobilizita por servi kiel milit-kuracisto en orienta Azio. Nur pro lia malbona sanostato li fine tamen rajtis resti en Varsovio (kaj poste vojaĝi al UK 1 en Aŭgusto 1905). Tion li alludas per „por longa tempo detranĉas [legu: detranĉus] min de la tuta mondo esperantista“.
______________________________________________________________________

2. La fora milito estis tre malpopulara en Ruslando, i.a. ĉe laboristoj kaj la liberala inteligentularo, kiuj postulis konstitucion, ĝeneralan elekto-rajton je popola reprezentantaro kaj civitanajn rajtojn, i.a. pli bonajn laborkondiĉojn, agraran reformon, abolon de la cenzuro, religian toleremon kaj ĝenerale finon de l’ despotismo. Komence de Jan. 1905 okazis ĝenerala striko i.a. en produktejoj gravaj por militaj resursoj en la tiama ĉefurbo Peterburgo. Protesta marŝo al la residenco de la caro (Vintra Palaco) finis per mortpafado de multaj manifestaciantoj fare de caristaj soldatoj (Peterburga Sanga Dimanĉo). Sekvis perforta revolucia agado en Ruslando, kiu daŭris ĝis 1907. -- En tia situacio Z verkis la Antaŭparolon al FdE en Julio 1905 kiel (lingvo-) "konstitucio" por la "kvazaŭpopolo" de la esperantistoj:

Kiuj ideoj de la Antaŭparolo spegulas ideojn de la rusa revolucio de 1905? Citu la precizan vortumon, trovlokon kaj nomon de la "ideo" (principo).

Bonan sukceson kaj amuziĝon!