Ekzistas pli ol 10.000 periodaĵoj, gazetoj, revuoj, magazinoj kaj bultenoj en Esperanto. Nur malmultaj estas iom konataj. La granda plejmulto hodiaŭ estas forgesitaj, minacataj de pereo pro forĵeto, disfalo de acida papero, neceso malplenigi loĝejon de pioniro pro translokiĝo al maljunulejo. Jesuo de la Heras antaŭ kelkaj jaroj komenciĝis skani malnovajn kaj rarajn gazetojn kaj - komplete! - prezentas ilin en "Gazetoteko Lanti".

Ĉar mi estas "ŝatanto de malnova papero" mi vidis multajn, multajn ekzemplerojn el nia frua gazetaro. Kelkajn malmultajn titolpaĝojn mi ekprezentis en tiu blogo. Kaj tamen mi ĉiam trovas iun "novan" (t.e. malnovan) en Gazetoteko Lanti. Jen la "Suno Hispana" 4-a jaro, 1907, n-ro 37, instruas al ni, ke fondiĝis "Internacia klubo de l'esperantistoj" en Berlino kaj Esperanto-konsulejon en Valetta, Malto. Jen Esperanto-Kurier de januaro 1953 montras al ni foton de la Kurfürstendamm en "libera Berlino" (t.e. en la okcidenta parto sub la okupado de Usono, Britio kaj Francio). Jen foto el Rio 1948, jen rakontoj por junuloj en La Juna Vivo de 1935. Preskaŭ egalas kien vi klakas. Vi trovos multajn, multajn trezorojn kaj povas, se vi volas, ekĝoji pri tia riĉa Esperanto-kulturo.