www.youtube.com/watch

Mi eksciis pri ĝi nur hieraŭ.

Neniu el la ruslandaj esperantistoj priparolis ĝin... Strange...

Bela kantistino estis murduta dum la kantado en esperantista klubo en 1920aj jaroj. La krimesploron kondukas kelkaj personoj paralele kaj intermalhelpe. La esperantistaro estas montrata tre karikature, tamen meritite. La aŭtoro bone konas la medion. La lanti-istoj, la homaranistoj, la idistoj interbatalas en la lando mem bolanta en la kaldrono de la intercivitana milito. Bela kaĉo.

Eĉ pli rimarkinde estas ke la karikaturo de la esperantista iamo renkonteblas ankoraŭ nun, tute senŝanĝe. Se oni kaptus niatempan verdpugulon kaj ĵetus lin en la romanon, li vivus en ĝi kiel fiŝo enakve.

La herooj senĉese, ĉiuokaze ripetas la frazon "Babelono, Babelono estas alta Dia dono". Oni pardonu la -onon en la Babel-o al la aŭtoro, temas ja ne pri la lingvo. Laŭ la aserto kaj ĉefideo de Józefowicz, ĝuste la esperantistoj konstruis la babelan turon kaj priloĝas ĝin izolite. Vere ja, la plurlingveco ja estis la puno de la homa intenco konstrui la turon.

PS Mi spektis la filmon, kiu estas sufiĉe interesa. Esperanto estas nura atributo de la tiamo, same kiel la frizaĵoj, vestoj, hejmaĵoj apartenantaj al tiu freneza epoko.

PPS Jen la kelkaj frazoj pri Eo: Ĉetable ĉiuj parolis ruse, nur jen kaj jen iu el la invitintoj enmetadis frazeton en sia vulgare ĉanta lingvo. Kaj en tiuj zorge elparolataj vortoj oni aŭdis kupran tintadon, sed tio estis malkara samovara kupraĉo de la apotekista latino.