Enhave ĝi baziĝas sur "sarkraĵ-konkurso" de Norvega Junularo Esperantista el 2007. Sub severa kontrolo de scienca juĝkomisiono (Jardar Eggesbø Abrahamsen, prezidanto de Norvega Esperantista Ligo kaj doktoro pri lingvistiko, Otto Prytz, akademiano, kaj Heming Welde Thorbjørnsen, prezidinto de TEJO), oni premiis proponojn por plej aĉaj insultoj kaj vulgarismoj. Uzanto povas aŭ elekti preferatajn insultojn aŭ lasi la programon hazarde kombini ilin el centoj da ebloj. La rezulto estas ekzemple: "Hej, aĉa protolegomo malkapabla kalkuli kiom estas du plus du! Same vi stinkas kiel dek kilogramoj da furzoj marinitaj en sterko. - La ĉefkontisto dronigu vin post deca bastonado!"

Tiaj maldecaj infanaĵoj eble plaĉas al kapitano Hadok kaj homoj, kiuj ne aŭskultis, kion panjo instruis pri ĝentila konduto. Mi persone estas tute ŝokita, ke tia skandalo eblas en harmonia rond' de verdkoruloj. Ke "samideanoj" foruzas sian junecon por tiaj aĵoj anstataŭ - ekzemple - dece honorigi niajn amatajn movadajn (eks-) gvidantojn alportante florbukedojn - neakcepteble!

Bv. protesti amase!